Një metrikë alternative dhe indirekte e matjes së cilësisë së Institucioneve të Arsimit të Lartë (IAL) e publikoi këto ditë, Cybermetrics Lab, pjesë e Spanish National Research Council me seli në Madrid, duke mbledhur numrin e citimeve të mbi 5000 Institucioneve të Arsimit të Lartë në Google Scholar. Algoritmi i përdorur nga Cybermetrics ka përzgjedhur nga secili institucion top 100 profilet (mësimdhënësit ) më të cituara, pastaj nga ky top 100 ka larguar 5 profilet më të cituara, ashtu që krahasimi në mes të institucioneve të jetë i pavarur nga madhësia e tyre dhe të mos ndikohet nga 4-5 mësimdhënësit më të cituar, siç e kanë shpjeguar në ueb faqen e tyre http://www.webometrics.info/en/transparent.
Nëse mblidhen dhe krahason këto shënime (citimet) shihet që Universiteti i Prishtinës ka shënuar progres mbi 55%, në periudhën Janar – Korrik 2019, por ende mbesim prapa universiteteve të rajonit. Është për të ardhur keq që në këtë listë përveç Kolegjit AAB, nuk është listuar asnjë Institucion i Arsimit të Lartë i Kosovës, as ato që Agjencia Akreditimit ua ndaloi përkohësisht regjistrimin e studentëve të rinj!