Dje Cybermetrics Lab, pjesë e Spanish National Research Council me seli në Madrid, azhurnoi listën e rangimit të Institucioneve të Arsimit të Lartë (mbi 29.000) në ueb faqen e tyre webometrics.info.

Nëse analizohet me kujdes rangimi, i vizualizuar me bump chart, bazuar në shënimet e Webometrics, shihet qartë se Universiteti i Prishtinës në vazhdimësi është lider i arsimit të lartë në hapësirën mbarë shqiptarë, ndërsa Kolegji AAB ka shënuar progresin më të madh ndër vite, pasuar nga Universiteti i Europës Juglindore, Kolegji Universum dhe Universiteti Europian i Tiranës.

Universiteti i Prishtinës ka shënuar progres të pakontestueshëm viteve të fundit në hulumtime shkencore, e vlerësuar me dy kritere nga Webometrics: (i) Excellence – me 35% të peshës totale, duke numëruar numrin e punimeve shkencore gjatë viteve 2013-2017 dhe (ii) Openess – me 10% duke numëruar numrin e citimeve sipas Google Scholar. Rangimi i Universitetit të Prishtinës ka mundur të jetë edhe më i mirë, sikur Universiteti i Prishtinës t’i kushtonte më shumë kujdes edhe imazhit të vet digjital, në hapësirën virtuale, dhe kështu do ta përmirësonte parametrin Visibility (pesha 50%) që matet përmes algoritmeve të indeksimit Ahref dhe Majestic, (shih shpjegimet e algoritmit të rangimit në http://www.webometrics.info/en/current_edition).

Universiteti i Prishtinës përfundimisht duhet ta largoj modestinë dhe të promovoj me tepër projektet, kombëtare dhe ndërkombëtare, të mësimdhënësve dhe studentëve, edhe në hapësirën virtuale. Por, gara e vërtet fillon kur krahasohemi me fqinjët tanë, dhe aty kemi ende punë për të bërë!